Günəş öz ziyası ilə aləmi nura qərq edir, torpaq qış yuxusundan oyanır. Elimizə bahar gəlir!

Bəs sözün əsl mənasında min illik tarixə malik Novruz bayramını necə qeyd etmək olar? Məhz harada bayram ab-havasını duya bilərsiz?

Şübhəsiz ki, İçərişəhərdə!  Qeyd edək ki, sülh, firavanlıq, dostluq kimi əvəzedilməz dəyərləri özündə ehtiva edən bu qədim bayram 2009-cu ildə Azərbaycan Respublikasının da təmsil olunduğu ölkələrin müraciəti ilə YUNESKO tərəfindən bəşəriyyətin qeyri maddi-mədəni irs üzrə Reprezentativ siyahısına daxil edilib. Belə bir ümumdünya əhəmiyyətli bayramın qeyd edildiyi başlıca ölkələrdən biri olan Azərbaycanda Novruz şənlikləri məhz İçərişəhərin adı ilə bağlıdır. Yaşı yüz illərlə ölçülən bayram ölkənin tarixi-mədəni mərkəzində daha da rövnəqlənə bilər.

Odur ki, “İçərişəhər" DTMQİ paytaxt sakinlərini və qonaqlarını ənənəvi "Bahar Qalası" festivalına dəvət edir! 20-26 mart tarixlərində baş tutacaq festivalda siz sehrli bir aləmə düşəcəksiniz.  Qoşa Qala meydanındakı dekorasiyalar  qonaqları  Bakımızın keçmişinə səyahətə aparacaq. Ənənəvi olaraq təşkil edilən konsert proqramı festival ərzində hər gün saat 12:00-dan axşam saat 18:00-a qədər davam edərək, tamaşaçılara həm milli, həm də digər xalqların nümayəndələrinin ifasında Novruz ənənəsinə sadiq olaraq bir-birindən fərqli rəqslər və nəğmələr təqdim edəcək, estradamızın  ulduzlarının ifasında sevilən mahnılar səslənəcəkdir.

Festival müddətində İçərişəhərin hər bir guşəsi çıraqban olacaqdır. Qüllə küçəsi boyunca tavandan asılacaq rəngarəng lentlər, hava şarları və çilçıraqlar, keçiddə canlandırılacaq opera səhnəcikləri izləyənlərdə sehrli bir nağıl təəssüratı yaradacaq.

Həmçinin Qüllə küçəsi boyu qurulacaq “Şərq Bazarı”, oradakı tacirlərin və onların dəvələrinin istirahət etməsi bu ərazini öz tarixi gözəlliyinə qovuşduracaq. Bazarda yerli quru meyvə və çərəz markaları öz məhsullarının çeşid zənginliyi ilə qonaqları təəccübləndirəcəkdir.

Qız Qalasının arxasındakı meydanda İçərişəhərin sakinlərinin qonaqlara öz qonaqpərvərliklərini nümayiş etdirmək, onlara Bakı mətbəxinin zənginliklərini sərgiləmək və əlavə gəlir əldə etmək üçün 3 satış nöqtəsi təmənnasız onların istifadəsinə veriləcəkdir.

Qız Qalası qarşısında yerləşən meydanda Azərbaycan Respublikası ərazisində yaşayan xalqların uşaq ansamblları öz milli geyimlərində ifa edəcəkləri rəqslər və nəğmələrlə izləyənlərə Novruz bayramının çoxsaylı etnik qrupları birləşdirməsini, Azərbaycan ərazisində yaşayan xalqların firavan həyatını nümayiş etdirəcəkdir.

Bütün bu yeniliklər ilə yanaşı isə gəncləri sevindirəcək bir xəbərimiz var. Yalnız 1 gün - 23 mart tarixində, saat 17:00-da Qoşa Qala meydanında Türkiyənin gənc estrada ulduzu Aleyna Tilki konsert proqramı ilə çıxış edəcəkdir!

Beləliklə, “Bahar Qalası” festivalı səbirsizliklə sizin yolunuzu gözləyir! Bayram sevincini İçərişəhərdə yaşayın!