Xəbərlər

Bu gün paytaxtın tarixi məkanı, “İçərişəhər” Dövlət Tarix-Memarlıq Qoruğu ərazisində Azərbaycanın turizm və mədəniyyət sektoruna yeni bir rəng qatan Bakı İllüziya Muzeyinin təntənəli açılış mərasimi keçirilib. Müslim Maqomayev küçəsi 46 ünvanında fəaliyyətə başlayan bu unikal məkan, ölkəmizdə ilk dəfə təqdim edilən interaktiv illüziya konsepsiyası ilə ziyarətçilərə reallıq və xəyal arasındakı sərhədləri tam fərqli bir şəkildə hiss etdirmək məqsədilə yaradılıb. Açılış tədbirində “İçərişəhər” Dövlət Tarix-Memarlıq Qoruğu İdarəsinin rəhbərliyi, Milli Məclisin deputatları, tanınmış sənət adamları, media nümayəndələri və illüziyaların sehrli dünyasına maraq göstərən çoxsaylı qonaqlar iştirak ediblər.

Açılışda çıxış edən “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud bildirib ki, belə innovativ məkanların yaradılması İçərişəhərin turizm potensialını daha da artırır və paytaxtın mədəni həyatına yeni rəng qatır. O qeyd edib ki, muzey həm yerli sakinlər, həm də xarici turistlər üçün fərqli və yaddaqalan təcrübə vəd edir.

Ümumilikdə 3 mərtəbədən və 20 fərqli tematik otaqdan ibarət olan muzey, hər bir guşəsində ziyarətçilərin qavrayışını sınağa çəkən və beyin oyunları ilə zənginləşdirilmiş vizual effektlər təqdim edir. Burada yer alan Ames Otağı, Sonsuzluq Otağı, Güzgü Labirinti, Vortex Tuneli, 3D İllüziya və Perspektiv Otaqları kimi unikal məkanlar qonaqlara həm əyləncəli, həm də öyrədici bir təcrübə vəd edir. Hər yaş qrupundan olan insanlar üçün maraqlı atmosferin yaradıldığı muzeydə, peşəkar bələdçilər Azərbaycan, rus və ingilis dilli xidmətləri ilə həm yerli, həm də beynəlxalq turistlərin ziyarətini daha məlumatlı və rahat edirlər.

Muzeyin üst qatında yerləşən terras və kafeteriya isə ziyarətçilərə unikal təcrübələrdən sonra İçərişəhərin füsunkar mənzərəsinə qarşı dincəlmək və müxtəlif içkilərdən dadmaq imkanı yaradır. Müasir dizaynı və pozitiv ab-havası ilə seçilən Bakı İllüziya Muzeyi, foto və video çəkilişləri üçün təqdim etdiyi ideal şəraitlə həm ailələr, həm də gənclər üçün şəhərin yeni cazibə mərkəzinə çevrilməyi hədəfləyir. Bakı şəhərinin mədəni irsini və turizm potensialını daha da zənginləşdirən bu layihə, regionun illüziya mövzusunda ilk və yeganə təcrübə mərkəzi kimi Azərbaycanın turizm xəritəsində xüsusi yer tutacaqdır.