UNESCO-nun mirası
UNESCO-nun mirası
İçərişəhər — Bakı şəhərinin qədim nüvəsi, Azərbaycanın paytaxtının tarixi ürəyidir. Bu unikal şəhər kompleksi minilliklər boyu Qafqazın mədəni, memarlıq və ictimai həyatında mühüm rol oynamış, özündə müxtəlif dövrlərin izlərini qoruyub saxlamışdır.
UNESCO-nun Ümumdünya İrs Siyahısı
2000-ci ildə İçərişəhər UNESCO-nun Ümumdünya İrs Siyahısına daxil edilmişdir. Bu qərar, İçərişəhərin yalnız Azərbaycan üçün deyil, bütün bəşəriyyət üçün əvəzsiz dəyərə malik olduğunu təsdiqləyir. 2003-cü ildə İçərişəhər Bakıda baş vermiş zəlzələ və vahid konservasiya və idarəetmə siyasətinin olmaması səbəbindən UNESCO-nun Təhlükədə olan Abidələr Siyahısına daxil edilmişdir. Azərbaycan Respublikasının Prezidenti cənab İlham Əliyevin 10 fevral 2005-ci il tarixli sərəncamına əsasən “İçərişəhər” Dövlət Tarix-Memarlıq Qoruğu İdarəsi yaradılmışdır. 2009-cu ildə İçərişəhərin Konservasiya üzrə Baş Planı Nazirlər Kabineti tərəfindən təsdiq edilmiş və həmin il İçərişəhər UNESCO-nun Təhlükədə olan Abidələr Siyahısından çıxarılmışdır.
Yaşayan tarix
İçərişəhərin dar küçələri, qədim daş evləri, məscidləri, karvansaraları və hamamları şəhərin minillik tarixindən danışır. Burada Şərq və Qərb memarlıq üslubları bir-birinə qarışaraq unikal şəhər panoraması yaradıb. Qız Qalasının sirli silueti, Şirvanşahlar Sarayının zərif ornamentləri və qala divarlarının möhtəşəmliyi İçərişəhərin əsrlər boyu formalaşmış bədii və tarixi dəyərini əks etdirir.
Bu gün İçərişəhər təkcə bir tarixi abidə deyil — o, yaşayan bir məkandır. Burada qədimlə müasirlik yan-yana mövcuddur: qədim daş divarların arasında kafe, qalereya və sənət emalatxanaları fəaliyyət göstərir, yerli sakinlər gündəlik həyatlarını bu unikal mühitdə davam etdirirlər.
Açıq səma muzeyi
“İçərişəhər” Dövlət Tarix-Memarlıq Qoruğu İdarəsi tərəfindən UNESCO standartlarına uyğun aparılan bərpa və qoruma işləri nəticəsində İçərişəhər öz orijinallığını qorumaqla yanaşı, dünyanın hər yerindən gələn ziyarətçilər üçün açıq səma muzeyinə çevrilmişdir.